„საუკუნის პროცესი” — O.J. Simpson-ის საქმე და სამართლის ყველაზე დიდი გაკვეთილები

1994 წლის 12 ივნისი, ღამის 22:15 საათი. ლოს-ანჯელესი, ბრენტვუდის უბანი. ნიქოლ ბრაუნ სიმფსონი და მისი მეგობარი რონ გოლდმანი საკუთარი სახლის კართან გარდაცვლილები იპოვეს. ეზო სისხლით იყო მოთხვრილი. გამოძიება დაუყოვნებლივ დაიწყო და ამ წუთიდან, მომდევნო 16 თვის განმავლობაში, მთელი ამერიკა — და შემდეგ მთელი მსოფლიო — ადამიანური მართლმსაჯულების ყველაზე რეზონანსულ, დრამატულ და საგანმანათლებლო შოუს მიჰყვა.

ო. ჯეი სიმფსონის (O.J. Simpson) სისხლის სამართლის საქმე ისტორიაში „საუკუნის პროცესად“ შევიდა — არა იმიტომ, რომ ის ყველაზე სასტიკი ან კომპლექსური დანაშაული იყო, არამედ იმიტომ, რომ ერთ სასამართლო დარბაზში ერთმანეთს სამი ფუნდამენტური ფენომენი შეეჯახა: სისხლის სამართლის საპროცესო პრინციპები, რასობრივი კრიზისი და ტელევიზია. ამ სამის კომბინაციამ ამერიკის სამართლებრივი სისტემა სარკის წინ დააყენა — და ამ სარკემ რეალობის ჩვენებაზე უარი არ თქვა.

ეს სტატია დეტალურად მიმოიხილავს აღნიშნული საქმის ქრონოლოგიას — ფაქტებს, სასამართლო სხდომებს, ტაქტიკურ გაკვეთილებს — და ბოლოს გააანალიზებს, თუ რა კავშირი აქვს ამ ყველაფერს ქართულ სისხლის სამართლის პროცესთან.

I. ვინ იყო ო. ჯეი სიმფსონი?

ორენთალ ჯეიმს სიმფსონი (Orenthal James Simpson) — ლეგენდარული ამერიკელი ფეხბურთელი, „ბაფალო ბილსისა“ და „სან-ფრანცისკო 49ers-ის“ ვარსკვლავი, 1968 წლის ჰეისმენის ტროფის (Heisman Trophy) მფლობელი და 1970-იანი წლების ერთ-ერთი ყველაზე სახელგანთქმული ამერიკელი სპორტსმენი იყო. კარიერის დასრულების შემდეგ მან თავი ჰოლივუდში დაიმკვიდრა — გახდა კინოვარსკვლავი, მსხვილი ბრენდების სარეკლამო სახე და ნამდვილი ეროვნული სიმბოლო. სახელი „ო. ჯეი“ ამერიკაში ყველამ იცოდა.

1985 წელს ო. ჯეიმ ნიქოლ ბრაუნზე იქორწინა, რომელიც მასზე 17 წლით უმცროსი იყო. მათი თანაცხოვრება ბედნიერი არ აღმოჩნდა. 1989 წელს სიმფსონს ოჯახური ძალადობისთვის ჯარიმაც კი დაეკისრა — პოლიციის ჩარევის ამსახველი ეს ჩანაწერები სასამართლო პროცესზე მოგვიანებით მძიმე დარტყმად იქცეოდა. 1992 წელს ნიქოლმა განქორწინება მოითხოვა. ორი წლის შემდეგ კი ის უკვე მკვდარი იყო.

II. ღამე, რომელმაც ყველაფერი შეცვალა

1994 წლის 12 ივნისი, კვირა ღამე. 35 წლის ნიქოლ ბრაუნ სიმფსონი შვილებთან ერთად რესტორან Mezzaluna-ში ვახშმობის შემდეგ შინ დაბრუნდა. დაახლოებით 22:00 საათისთვის, მეზობლებმა ქუჩაში ნიქოლის აკიტას ჯიშის ძაღლი შეამჩნიეს, რომელსაც თათები სისხლიანი ჰქონდა. ძაღლი გამაყრუებლად და მოუსვენრად ყეფდა. ერთ-ერთი მეზობელი ცხოველს გაჰყვა, რათა გაერკვია, რა ხდებოდა.

სურათი, რომელიც ადგილზე დახვდათ, შემზარავი იყო: ნიქოლ ბრაუნ სიმფსონი სახლის კარის წინ, მიწაზე სახით ქვევით იწვა. მას ყელი ჰქონდა გამოჭრილი. იქვე ახლოს აღმოაჩინეს 25 წლის რონ გოლდმანიც — ნიქოლის მეგობარი და ადგილობრივი რესტორნის ოფიციანტი, რომელსაც სხეულზე დანის 30-ზე მეტი ჭრილობა აღენიშნებოდა.

ადგილზე პოლიცია გამოიძახეს. ღამის 01:00 საათისთვის დანაშაულის ადგილზე ლოს-ანჯელესის პოლიციის დეპარტამენტის (LAPD) ოთხი დეტექტივი მივიდა, მათ შორის — მარკ ფურმანი, რომლის სახელიც ამ საქმეში სამუდამოდ ჩაიწერა.

გათენებამდე დეტექტივები სიმფსონის სახლთან მივიდნენ, რათა ოჯახისთვის მომხდარი შეეტყობინებინათ. ფურმანის ჩვენების მიხედვით, ეზოს უკანა ნაწილში, ბალახში მან ყავისფერი, სისხლით შეღებილი ტყავის ხელთათმანი იპოვა. აღსანიშნავია, რომ ზუსტად ამ ხელთათმანის მეორე ცალი უშუალოდ დანაშაულის ადგილზე ეგდო. ეს ნივთმტკიცება საქმის ცენტრალურ ფიგურად და უმძიმესი სასამართლო შეცდომის კატალიზატორად იქცა.

III. თეთრი „ბრონქოს“ დევნა პირდაპირ ეთერში

1994 წლის 17 ივნისს ო. ჯეი სიმფსონის დაკავების ორდერი გაიცა. პოლიციამ მას ნებაყოფლობითი გამოცხადებისთვის ვადა 11:00 საათამდე მისცა, თუმცა სიმფსონი არ გამოჩნდა.

ამის შემდეგ ტელეეკრანებზე გაიშალა სანახაობა, რომელსაც ანალოგი ამერიკის მედიის ისტორიაში არ ჰქონია. სიმფსონის მეგობარი, ალ ქაულინგი, თეთრ Ford Bronco-ს მართავდა, რომლის უკანა სავარძელზეც იარაღმომარჯვებული ო. ჯეი იჯდა და თვითმკვლელობით იმუქრებოდა. ავტომობილს უკან პოლიციის 20-ზე მეტი მანქანა მიჰყვებოდა. Bronco სულ რაღაც 35 მილი/საათში სიჩქარით გადაადგილდებოდა — ეს „ნელი დევნა“ ისტორიაში შევიდა.

ამ ტრანსლაციას პირდაპირ ეთერში 95 მილიონი ამერიკელი ადევნებდა თვალს. სატელევიზიო ბადეში NBA-ის ფინალის ჩვენებაც კი შეწყდა, რათა ეთერი ამ დევნისთვის დაეთმოთ. საბოლოოდ, სიმფსონი საკუთარ სახლთან პოლიციას ჩაბარდა, სადაც მას ასობით გულშემატკივარი დახვდა. იგი დააპატიმრეს.

IV. „Dream Team“ — მსოფლიოში ყველაზე ძვირადღირებული დაცვა

სისხლის სამართლის მართლმსაჯულებაში უდიდესი მნიშვნელობა აქვს იმას, თუ ვინ იცავს ბრალდებულის ინტერესებს. სიმფსონმა შეკრიბა საუკეთესო იურისტების გუნდი, რომელსაც პრესამ „ოცნების გუნდი“ (Dream Team) შეარქვა. მასში შედიოდნენ:

• რობერტ შაპირო — ლოს-ანჯელესის ელიტური ადვოკატი, გუნდის პირველი ხელმძღვანელი.

• ჯონი კოქრანი — ამერიკის ყველაზე ცნობილი შავკანიანი უფლებადამცველი, პოლიციის მხრიდან ძალადობის საქმეების უბადლო სპეციალისტი, რომელიც პროცესის მთავარი სტრატეგი გახდა.

• ალან დერშოვიცი — ჰარვარდის სამართლის სკოლის პროფესორი, სააპელაციო სამართლის ლეგენდა.

• ბარი შეკი — პროექტ „უდანაშაულობის“ (Innocence Project) თანადამფუძნებელი, დნმ-ის მტკიცებულებათა მეცნიერული კრიტიკის ექსპერტი.

• ფ. ლი ბეილი — ამერიკის ისტორიაში ერთ-ერთი ყველაზე მწვავე და გამჭრიახი ადვოკატი ჯვარედინი დაკითხვის სფეროში.

ბრალდების მხარეს გამოცდილი პროკურორები — მარსია კლარკი და კრისტოფერ დარდენი წარმოადგენდნენ.

V. ბრალდების მტკიცებულებები — ერთი შეხედვით, უტყუარი

სახელმწიფოს მიერ წარმოდგენილი მტკიცებულებათა ნუსხა შთამბეჭდავი იყო:

• სისხლი: სიმფსონის სისხლი (დნმ ანალიზით დადასტურებული) ნიქოლის სახლის კარებთან იპოვეს. ბრალდებულის სისხლის კვალი აღმოჩნდა მისივე Ford Bronco-ს სალონსა და კარებზე, ასევე მისი სახლის ჰოლში. ნიქოლ ბრაუნის სისხლი კი სიმფსონის საძინებელში ნაპოვნ წინდებზე ფიქსირდებოდა.

• ხელთათმანი: მდიდრული ბრენდის, Aris Isotoner-ის ერთი ხელთათმანი მკვლელობის ადგილზე ეგდო, ხოლო მეორე — სიმფსონის ეზოში, დეტექტივ ფურმანის მიერ იქნა ნაპოვნი. ორივე ხელთათმანი შეიცავდა როგორც მსხვერპლთა, ისე თავად ო. ჯეის დნმ-ს.

• ფეხსაცმლის კვალი: შემთხვევის ადგილზე დაფიქსირდა 12 ზომის Bruno Magli-ს ექსკლუზიური ფეხსაცმლის კვალი. სიმფსონი სწორედ ამ ზომას ატარებდა. მიუხედავად იმისა, რომ მან უარყო ასეთი მოდელის ქონა, დაცვის მხარემ მოგვიანებით აღმოაჩინა ძველი ფოტოები, სადაც სიმფსონს სწორედ ეს ფეხსაცმელი ეცვა.

• მოწმეები: ლიმუზინის მძღოლმა, ალან პარკმა დაადასტურა, რომ მკვლელობის სავარაუდო დროს სიმფსონი სახლში არ იმყოფებოდა, ხოლო მისმა მდგმურმა, კატო კეილინმა 22:45 საათზე სახლის გარე კედელთან ძლიერი ბრახუნის ხმა გაიგო (სადაც მოგვიანებით ხელთათმანი იპოვეს).

ბარი შეკის მიერ ეჭვქვეშ დაყენებამდე, დნმ-ის ანალიზი აჩვენებდა, რომ შემთხვევის ადგილზე ნაპოვნი სისხლის სხვა ადამიანთან დამთხვევის ალბათობა 7 მილიარდში მხოლოდ 1 იყო.

VI. დაცვის სტრატეგია — სისტემის წინააღმდეგ

ჯონი კოქრანმა და მისმა გუნდმა გენიალური, თუმცა სარისკო სტრატეგია აირჩიეს: მათ დაიწყეს არა მტკიცებულებების შინაარსობრივი უარყოფა, არამედ იმ ინსტიტუტის დისკრედიტაცია, რომელმაც ეს მტკიცებულებები მოიპოვა.

მათი მთავარი თეზისი ასეთი იყო: ლოს-ანჯელესის პოლიცია (LAPD) — უწყება, რომელსაც შავკანიანი მოსახლეობა როდნი კინგის სასტიკი ცემის გამო რასისტულ ორგანიზაციად მიიჩნევდა — ცდილობდა სიმფსონისთვის დანაშაულის დაბრალებას. მათი მტკიცებით, დეტექტივმა მარკ ფურმანმა, რომელიც რასისტული შეხედულებებით გამოირჩეოდა, ხელთათმანი თავად ჩააგდო სიმფსონის ეზოში საქმის ფალსიფიკაციისთვის.

ეს იყო პოლიტიზებული და სახიფათო ნაბიჯი, თუმცა ბრალდების მხარის მიერ დაშვებულმა საბედისწერო შეცდომებმა დაცვას გამარჯვების გზა გაუხსნა.

VII. ხელთათმანის ეპიზოდი — ტაქტიკური კრახი

1995 წლის 15 ივნისს პროკურორმა კრისტოფერ დარდენმა, მთავარი პროკურორის, მარსია კლარკის წინააღმდეგობის მიუხედავად, მოითხოვა, რომ ო. ჯეი სიმფსონს სასმატლო დარბაზში, ნაფიცი მსაჯულების წინაშე მოერგო დანაშაულის ადგილზე ნაპოვნი ტყავის ხელთათმანი.

სიმფსონი წამოდგა, ჯერ დამცავი ლათექსის ხელთათმანები ჩაიცვა, შემდეგ კი ტყავის ხელთათმანის მორგება დაიწყო. მან სახის მანჭვითა და თეატრალური მოძრაობებით აჩვენა, რომ ხელთათმანი მის ხელზე ფიზიკურად არ ჩადიოდა. ხელთათმანი აშკარად პატარა იყო.

ამის შემდეგ ჯონი კოქრანმა წარმოთქვა თავისი ისტორიული ფრაზა, რომელიც საქმის მთავარ ლოზუნგად იქცა:

“If it doesn’t fit, you must acquit.” (თუ არ ერგება, უნდა გაამართლოთ).

სამართლებრივი თვალსაზრისით, ეს ეპიზოდი კლასიკური შეცდომა იყო:

1. ბრალდების მხარემ დაარღვია ოქროს წესი: არასოდეს ჩაატარო საგამოძიებო ექსპერიმენტი ნაფიცი მსაჯულების წინაშე, თუ წინასწარ 100%-ით არ იცი მისი შედეგი.

2. ხელთათმანი იყო ტყავის, დასველებული მსხვერპლთა სისხლით, გამხმარი და შემდგომ ლაბორატორიულად დამუშავებული, რის გამოც ტყავი ბუნებრივად შეიკუმშა.

3. სიმფსონს ქვემოდან ლათექსის ხელთათმანი ეცვა, რაც ხახუნს ზრდიდა. გარდა ამისა, მან პროცესამდე ორი კვირით ადრე შეწყვიტა ართრიტის საწინააღმდეგო მედიკამენტების მიღება, რამაც მისი სახსრების შეშუპება გამოიწვია.

VIII. მარკ ფურმანი — სანდოობადაკარგული მოწმე

დაცვის გუნდის კიდევ ერთი ტრიუმფი ადვოკატ ფ. ლი ბეილის მიერ დეტექტივ მარკ ფურმანის ჯვარედინი დაკითხვა იყო.

ბეილიმ ფურმანს პირდაპირ ჰკითხა, გამოუყენებია თუ არა მას ბოლო ათი წლის განმავლობაში აფროამერიკელების მიმართ შეურაცხმყოფელი რასისტული ტერმინები (ე.წ. „N-word“). ფურმანმა ფიცის ქვეშ ეს მკაცრად უარყო. თუმცა, ადვოკატებს ხელთ ჩაუვარდათ აუდიოჩანაწერები, სადაც ფურმანი სცენარისტ ლორა მაკკინისთან ინტერვიუში არაერთხელ იყენებდა ამ ტერმინს და პოლიციის მხრიდან მტკიცებულებათა მანიპულირებაზეც საუბრობდა.

მოწმე აშკარა ტყუილში იქნა დაჭერილი. როდესაც ფურმანი ხელახლა გამოიძახეს, მან კონსტიტუციის მეხუთე შესწორება გამოიყენა (უფლება, არ მისცე ჩვენება საკუთარი თავის წინააღმდეგ). ამან ნაფიც მსაჯულებში გააჩინა განცდა: თუ მთავარი დეტექტივი რასისტია და ტყუის, მაშინ საქმის ნებისმიერი ნივთმტკიცება შეიძლება ფალსიფიცირებული იყოს.

IX. დნმ — მეცნიერება ჯვარედინი დაკითხვის წინააღმდეგ

იმ პერიოდისთვის დნმ-ის ტექნოლოგია სასამართლო პრაქტიკაში ახალი ხილი იყო და მსაჯულებს მისი სტატისტიკური მნიშვნელობა ბოლომდე არ ესმოდათ. ადვოკატმა ბარი შეკმა სამიზნედ საგამოძიებო ორგანოს ლაბორატორიული შეცდომები აირჩია.

მან დაამტკიცა, რომ:

• სისხლის ნიმუშები სათანადო გაციების გარეშე, თბილ მანქანაში ინახებოდა.

• სიმფსონისგან აღებული სისხლის ნიმუშიდან იდუმალებით გაქრა დაახლოებით 1.5 მლ სისხლი (რამაც გააძლიერა ვერსია, რომ პოლიციამ ეს სისხლი შემთხვევის ადგილზე დააქცია).

• კრიმინალისტები ნივთმტკიცებებს ერთი და იმავე ხელთათმანით ეხებოდნენ, რამაც გამოიწვია ჯვარედინი დაბინძურება (Cross-contamination).

შეკმა გამოიყენა ცნობილი ფორენზიკული პრინციპი — „Garbage in, garbage out“ (თუ საწყისი მონაცემები უვარგისია, შედეგიც უვარგისი იქნება) — და მსაჯულები დაარწმუნა, რომ რაც უნდა სანდო ყოფილიყო მეცნიერება, არასწორად მოპოვებული ნიმუშები მას აზრს უკარგავდა.

X. განაჩენი — ორად გაყოფილი ამერიკა

1995 წლის 3 ოქტომბერს, 9-თვიანი დამქანცველი პროცესის შემდეგ, ნაფიცი მსაჯულები (რომელთა უმრავლესობასაც აფროამერიკელი ქალები შეადგენდნენ) სათათბიროდ შევიდნენ და სულ რაღაც 4 საათში გამოიტანეს ვერდიქტი: არ არის დამნაშავე (Not Guilty) ორივე ბრალდებაში.

სასამართლო დარბაზში გაჟღერებულმა განაჩენმა ამერიკა სოციალურად და რასობრივად ორად გაყო, რაც კარგად აისახა იმდროინდელ სოციოლოგიურ გამოკითხვებში:

XI. სამოქალაქო საქმე — ორი განსხვავებული სამართლებრივი სტანდარტი

1997 წელს მსხვერპლთა ოჯახებმა სიმფსონის წინააღმდეგ სამოქალაქო სარჩელი შეიტანეს. ამჯერად ო. ჯეიმ პროცესი წააგო: ნაფიც მსაჯულთა ჟიურიმ ის პასუხისმგებლად ცნო ნიქოლისა და რონის სიკვდილში და გარდაცვლილთა ოჯახების სასარგებლოდ 33.5 მილიონი აშშ დოლარის გადახდა დააკისრა.

როგორ შეიძლება პირი სისხლის სამართლით გამართლდეს, ხოლო სამოქალაქო წესით დამნაშავედ იქნეს ცნობილი? ეს არის ამერიკული სამართლის უმნიშვნელოვანესი გაკვეთილი მტკიცების სტანდარტების შესახებ:

XII. შემდგომი ცხოვრება

ო. ჯეი სიმფსონი მართლმსაჯულებას მაინც ვერ გაექცა. 2007 წელს ის ლას-ვეგასში შეიარაღებული ძარცვისთვის დააპატიმრეს და 2008 წელს 33 წლით თავისუფლების აღკვეთა მიესაჯა. 9 წლის მოხდის შემდეგ, 2017 წელს იგი პირობით ვადამდე გაათავისუფლეს. სიმფსონი 2024 წლის 10 აპრილს, 76 წლის ასაკში, პროსტატის კიბოთი გარდაიცვალა.

XIII. სამართლებრივი გაკვეთილები ქართული საპროცესო სამართლისთვის

მიუხედავად იმისა, რომ ეს პროცესი აშშ-ში ჩატარდა, მისი ანატომია პირდაპირ კავშირშია საქართველოს სისხლის სამართლის საპროცესო კოდექსთან (სსსკ), რომელიც დიდწილად სწორედ ანგლო-ამერიკულ, შეჯიბრებით მოდელს ეფუძნება.

1. უდანაშაულობის პრეზუმფცია და გონივრული ეჭვი

საქართველოს სსსკ-ის მე-8 მუხლი განამტკიცებს უდანაშაულობის პრეზუმფციას, რომლის მიხედვითაც, ყოველი ეჭვი, რომელიც ვერ დადასტურდება კანონით დადგენილი წესით, უნდა გადაწყდეს ბრალდებულის სასარგებლოდ. სიმფსონის საქმე ამ პრინციპის კლასიკური ილუსტრაციაა: ბრალდებამ ვერ შეძლო ეჭვების სრული გაქარწყლება, რამაც გამართლება გამოიწვია.

2. მტკიცებულებათა მოპოვების წესი და დაცვის ჯაჭვი (Chain of Custody)

საქართველოს საპროცესო კანონმდებლობა მკაცრად არეგულირებს საგამოძიებო მოქმედებების ჩატარებისა და მტკიცებულებათა შენახვის წესებს. ბარი შეკის ტაქტიკამ აჩვენა, რომ მტკიცებულების დაზიანება ან არასწორი აღრიცხვა (Chain of custody-ის დარღვევა) მის დაუშვებლობას ან იურიდიული ძალის დაკარგვას იწვევს, რაც დღეს ქართულ სასამართლო პრაქტიკაშიც უმნიშვნელოვანესი ბერკეტია დაცვის მხარისთვის.

3. ჯვარედინი დაკითხვა — სამართლის ხელოვნება

საქართველოს სსსკ-ის 244-ე მუხლი ითვალისწინებს მოწმის ჯვარედინ დაკითხვას. ფ. ლი ბეილის მიერ დეტექტივ ფურმანის დაკითხვა სახელმძღვანელო მაგალითია იმისა, თუ როგორ შეუძლია სწორად დასმულ შეკითხვებსა და მოწმის წინასწარ შესწავლას საქმის მიმართულების სრული შეცვლა. ქართულ რეალობაში ჯვარედინი დაკითხვა ხშირად ფორმალურ ხასიათს ატარებს, თუმცა ეს საქმე გვიჩვენებს მის რეალურ ძალას.

4. სისხლისა და სამოქალაქო სამართლის გამიჯვნა

საქართველოში, თუ სისხლის სამართლის საქმეზე პირი გამართლდა ქმედების არარსებობის ან ბრალეულობის დაუმტკიცებლობის გამო, სისხლის სამართლის პროცესში წარდგენილი სამოქალაქო სარჩელი განუხილველი რჩება, თუმცა დაზარალებულს უნარჩუნდება უფლება, ზიანის ანაზღაურების მოთხოვნით ცალკე მიმართოს სამოქალაქო სასამართლოს, სადაც მტკიცების სტანდარტი ბევრად დაბალია.

გამოყენებული წყაროები და სამართლებრივი აქტები

1. სასამართლო პრეცედენტები და საქმის მასალები (აშშ):

   • The People of the State of California v. Orenthal James Simpson (Case No. BA097211, 1995) — სისხლის სამართლის საქმის ძირითადი მასალები, ნაფიც მსაჯულთა ვერდიქტი და სასამართლო პროტოკოლები.

   • Fredric Goldman, et al. v. Orenthal James Simpson (1997) — სამოქალაქო საქმის გადაწყვეტილება მტკიცებულებათა უპირატესობის სტანდარტით და მატერიალური ზიანის დაკისრების ოქმი.

   • The Fuhrman Tapes (Laura Hart McKinny, 1994-1995) — დეტექტივ მარკ ფურმანის აუდიოჩანაწერები, რომლებიც დაცვის მხარემ მოწმის დისკრედიტაციისთვის გამოიყენა.

2. ნორმატიული აქტები და საკანონმდებლო ბაზა:

   • საქართველოს სისხლის სამართლის საპროცესო კოდექსი (სსსკ) — მე-8 მუხლი (უდანაშაულობის პრეზუმფცია და გონივრული ეჭვი), 244-ე მუხლი (მოწმის ჯვარედინი დაკითხვის წესი).

   • ამერიკის შეერთებული შტატების კონსტიტუციის მეხუთე შესწორება (The Fifth Amendment to the U.S. Constitution) — მოწმის უფლება, უარი თქვას საკუთარი თავის საწინააღმდეგო ჩვენების მიცემაზე (თვითინკრიმინაციის აკრძალვა).

3. კრიმინალისტიკური და ფორენზიკული მასალები:

   • ლოს-ანჯელესის პოლიციის დეპარტამენტის (LAPD) შემთხვევის ადგილის დათვალიერებისა და ნივთმტკიცებათა ამოღების ოქმები (1994 წლის 13 ივნისი).

   • დნმ-ის ექსპერტიზისა და კრიმინალისტიკური ლაბორატორიის დასკვნები (სისხლის ჯვარედინი დაბინძურებისა და Chain of Custody-ის აღრიცხვის ჟურნალები, ბარი შეკისა და ლაბორატორიული ექსპერტების ჩვენებები).